Бөгөн республика балалар клиник дауаханаһында компаундер аппараты эшләй башланы. Заманса технология етлекмәй тыуған һәм операциянан һуң реабилитация үтеүсе сабыйҙарҙы дауалауҙа ярҙам итә. Аппарат хәйриә фонды ойошторған акция ярҙамында һатып алынған.
Кнопкаларға бер нисә баҫыу менән кескәй пациенттарҙы туҡландырырға ҡатнашма йә дарыу әҙер була. Компаундер - яңы медицина аппараты шәфҡәт туташы эшен алыштыра. Быға тиклем инфузияларҙы шприцтар ярҙамында әҙерләһәләр, бөгөндән был хеҙмәттә яңы аппарт ҡулланыла.
Компаундер неонатология өлкәһендә заманса медицина ярҙамы күрһәтеүҙә алдынғы ҡорамал. Етлекмәй тыуған, яңы донъяға килгән сабыйҙарға һәм операциянан һуң реабилитация үткәреүҙә файҙаланыла.
Яңы аппаратты һатып алырға йүгереүселәр ярҙам иткән. Былтыр 29 июлдә республика балалар клиник дауаханаһы, "Наши дети" хәйриә фонды йүгереү марафоны үткәрҙе. Акцияла ҡатнашҡан һәр кем билет һатып алған һәм унан килгән аҡса заманса ҡоролманы һатып алыуға йүнәлтелгән.
Яңы ҡорамал сит илдеке һәм уның менән эшләргә өйрәтеү маҡсатында Республика балалар клиник дауаханаһына Германия вәкилдәр килде. 3 миллион 600 мең һум торған медицина техникаһы өсөн хәйриә акцияһы 400 мең һум йыйһа, ҡалғанын дистрибьютор компания түләгән. Республикала неонатология өлкәһендә ҡулланылыусы ул икенсе компаундер.
