Рәсәй көнө алдынан Башҡортостан Башлығы Рөстәм Хәмитов бер төркөм хеҙмәт алдынғыларына дәүләт наградалары тапшырҙы. Биш тиҫтәнән ашыу кешенең фиҙаҡәр хеҙмәте ордендар, почет грамоталары һәм маҡтаулы исемдәр менән баһаланды.
"Ашҡаҙар" радиоһы алып барыусыһы Зөмәйрә Сафинаның яғымлы тауышы республикала йәшәүселәргә яҡшы таныш. Ул рухи ҡиммәттәрҙе, халыҡ ижады ынйыларын һаҡлап ҡалыуға баһалап бөткөһөҙ ҙур өлөш индерә. Был йәһәттән эфир тулҡындарында яңғыраған "Ижади портрет" һәм "Халыҡ гәүһәрҙәре" тапшырыуҙарын атап үтеү ҙә етә. Улар геройҙарҙың шәхесен төрлө яҡлап асыуы һәм һәүәҫкәр ижадсылар менән таныштырыуы менән әһәмиәтле. Оҙаҡ йылдар радиола фиҙаҡәр хеҙмәт иткәне өсөн Зөмәйрә Сафина Башҡортостандың атҡаҙанған матбуғат һәм киң мәғлүмәт хеҙмәткәре исеме менән бүләкләнде. Юғары награданы бөгөн коллегабыҙға Рөстәм Хәмитов тапшырҙы.
Республика башлығы билдәләүенсә, юғары дәүләт наградалары тырышлыҡтары менән хөрмәт ҡаҙанған, үҙ эшмәкәрлегендә уңышҡа өлгәшкән хеҙмәт алдынғыларына бирелә. Бер үк ваҡытта ул башҡаларға ниндәйҙер кимәлдә ынтылыу өсөн стимул да булып тора.
Юғары исемдәр менән бүләкләнеүселәр араһында төрлө һөнәр эйәләре - ябай эшселәр ҙә, уҡытыусылар ҙа, спортсылар ҙа, сәнғәт вәкилдәре лә бар. Республиканың иң юғары наградаһы Салауат Юлаев ордены бөгөн Фәрзәнә Сәғитоваға тапшырылды. Вокал буйынса педагог сәнғәт институтында эшләү дәүерендә бик күп йырсыларҙы оло сәхнәгә сығарған.
Шулай уҡ бөгөн Башҡортостандың халыҡ яҙыусыһы исеменә "Бөйрәкәй" романы авторы Таңсулпан Ғарипова лайыҡ булды. Ул Зәйнәб Биишеванан һуң бындай юғары исемгә лайыҡ булған икенсе башҡорт ҡатын-ҡыҙы.
Октябрьскийҙан икмәк бешереүсе булып эшләүсе Мария Лихачева Башҡортостандың атҡаҙанған аҙыҡ-түлек индустрияһы хеҙмәткәре, Дыуан районынан агроном Нуриәхмәт Ҡотошев республиканың атҡаҙанған ауыл хужалығы хеҙмәткәре тигән исемдәргә лайыҡ булды. Бүләкләнеүселәргә уңыш өсөн төрлө кәртәләр аша үтергә лә тура килгән. Әммә көндәлек фиҙаҡәр хеҙмәт менән улар бар ауырлыҡтарҙы еңеп сығыуға өлгәшкән.
Шулай уҡ бер төркөм хеҙмәт алдынғылары Республиканың Почет грамотаһы, маҡтаулы исемдәр менән бүләкләнде.Тырыш кешеләрҙең фиҙаҡәр хеҙмәте һәр ваҡыт иғтибар үҙәгендә. Әлбиттә, күркәм сараның Рәсәйҙең төп дәүләт байрамы алдынан үтеүе айырыуса әһәмиәтле, ти бүләкләнеүселәр. Сөнки уларҙың барыһы ла ил үҫешенә, уның имен киләсәгенә тос өлөш индерә.
