Һөрөнтө ерҙәр нисек файҙаланыла

Ауыл хужалығын күҙәтеү буйынса федераль хеҙмәт идаралығының ер контроле бүлеге Кушнаренко районына рейдҡа сыҡты. Ғәҙәттән тыш хәлдәр министрлығы белгестәре менән берлектә үткәрелгән профилактик сара барышында һөрөнтө ерҙәрҙең маҡсатҡа ярашлы файҙаланылыуы тикшерелде.

Шәрип ауылы эргәһендә уларҙың иғтибарын ташландыҡ хәлгә килгән теплицалар йәлеп итте. Йәшелсә үҫтереүгә махсуслашҡан крәҫтиән-фермер хужалығы ауыр финанс хәлдә ҡалған. 16 гектар майҙанда әле сүп-сар үләндәре үҫә. Теплицалар күптән инде харабаға әйләнгән. Ҡаулан һәм сүп-сар Шәрип ауылы халҡына янғын ҡурҡынысы менән дә янай. Ер участкаһы иһә шәхси милектә. Рейдта ҡатнашыусылар крәҫтиән-фермер хужалығы етәксеһенә ҡарата административ йоғонто яһау сараларын ҡулланыу яҡлы.

Ер эшкәртелмәгән, сүп-сар янғын хәүефе менән янай. Был рейдтан һуң ер хужаһына ҡарата административ саралар ҡулланырға мәжбүр буласаҡбыҙ. Штраф күләме 400 меңдән 700 мең самаһы. Эшҡыуарға вазифа биләүсе булараҡ шулай уҡ 50 меңдән 100 мең һумға тиклем штраф билдәләнеүе ихтимал.

Алексей Гнездин, Башҡортостан буйынса ауыл хужалығын күҙәтеү федераль хеҙмәте идаралығының дәүләт ер контроле бүлеге етәксеһе

Иҫке Туҡмаҡлы ауылы эргәһендәге баҫыуҙа ла ҡаулан баҫҡан. Былтыр был тупраҡтарҙа иген урынына аҡ сәскә үҫкән. Дөрөҫ ул дарыу үләне тип иҫпәпләнә, әммә урындағы халыҡ билдәләүенсә, баҫыуҙа уны үҫтереүҙән файҙа юҡ. Был майҙан пай ерҙәре тип иҫәпләнә. Баҫыуҙы Өфөлә йәшәүсе эшҡыуарҙарҙың береһе арендаға алған. Әммә ерҙәр эшкәртелмәй, хужаларҙың был тирәгә килеп әйләнгәне лә юҡ, ти Иҫке Туҡмаҡлы ауыл биләмәһенең ер ҡоролошо белгесе Альбина Вәлиева

Ут сыға ҡалһа, баҫыуҙағы ҡаулан ҙур янғынға юл аса. Был кешеләргә лә хәүеф сығанағы тыуҙыра. Шуға ла ауыл хужалығы ерҙәре ҡоро үләндән таҙартылырға тейеш. Был талаптарҙы үтәмәүселәр закон буйынса административ яуаплылыҡҡа тарттырыла.

Урал Юлсурин, Ғәҙәттән тыш хәлдәр министрлығының Башҡортостан буйынса баш идаралығының Дүртөйлө район-ара бүлеге етәксеһе

(в2)

Автор: Рафиҡ Әхмәтшин.