Этнотөн

Бөгөн Өфө амфитеатрында "Евразия йөрәге" фестивале дауам итте. Халыҡ-ара сараның 4-се көнө Этнотөн тип атала. Сараға сит илдәрҙән һәм Рәсәй төбәктәренән халыҡ фольклорын данлаусы коллективтар саҡырылған. Башҡортостан юлдаш телевидениеһы саранан тура трансляция ойошторҙо.

Фестивалдең 4-се көнөн асыу хоҡуғы урындағы этно төркөмдәргә бирелде. Башҡортостан исеменән сәхнәгә халыҡ-ара фестивалдәр лауреаты - "Узорица" төркөмө менән популяр "Арғымаҡ" фольклор төркөмө сыҡты. Ойоштороусылар әйтеүенсә, биш көн дауамында фестивалдә 700-ләп музыканттың сығыш яһауы, тамашасылар һаны 100 меңдән ашыуы күҙалана.

Иртәгә өфөләр һәм баш ҡала ҡунаҡтарын фестивалдең гала-концерты көтә. Унда Америка йырысыһы Рональд Бейкери, "Шоу Голос" конкурсында ҡатнашыусы Анжелика Фролова, Наҙгөл Отузова һәм популяр "Пицца" төркөмө сығыш яһауы көтөлә. Гала-концерт сағыу тамашаға әйләнәсәк, тип вәғәҙәләй ойоштороусылар. Йомғаҡлау концертын фестивалдең сайтында һәм беҙҙең телеканалда ҡарарға мөмкин.

Беҙҙең төркөм 35 йыл элек ойошторолған. Беҙ ул саҡта бала ғына инек әле. Маҡсатыбыҙ халыҡ ижадын өлкәндәргә генә түгел, йәштәргә лә ҡыҙыҡлы итеү. Оҫталыҡты камиллаштырыу өҫтөндә даими эшләйбеҙ.

Полина Кобец, "Узорица" төркөмө солисы