Башҡортостан журналистары Шәһит Хоҙайбирҙиндың һәйкәленә сәскә һалды

Иртәгә Башҡортостан матбуғаты көнө. Шулай уҡ, 14 июнь, башҡорт телендә сыҡҡан тәүге башҡорт баҫмаһы "Башҡорт мөхбире" гәзите донъя күргән көн. Был тарихи ваҡиға республика матбуғат хеҙмәткәрҙәре көнөн билдәләүгә нигеҙ булып тора. Байрам алдынан матбуғат ветерандары Шәһит Хоҙайбирҙиндың йорт музейында йыйылды.

Унда "Журналистика минең яҙмышым" тип исмеләнгән конкурс һөҙөмтәләре иғлан ителде. Башҡортостан журналистар союзы рәйесе Артур Дәүләтбәков әйтеүенсә, 14 июнь республика матбуғаты көнөн билдәләү, ҡәләм оҫталары араһында һөнәри теләктәшлекте арттырыуҙы маҡсат итеп ҡуя.

Үҙегеҙ социаль селтәрҙәрҙе күҙәтеп бараһығыҙҙыр, унда традицион гәзит-журналдарҙа, радио-телевидениела эшләгән журналистарға: “Һеҙ дәүләт баҫмаһында эшләйһегеҙ”, - тип таш атыуҙар булһа ла, улар шундуғ үҙ хатаһын аңлайҙар һәм дөйөм бер эште башҡарыуыбыҙҙы аңлап хеҙмәт итәләр. Шуның өсөн бөтә коллегаларыбыҙға ла ҙур рәхмәтемде белдерәм!

Артур Дәүләтбәков, Башҡортостан журналистар союзы рәйесе

Күренекле дәүләт һәм йәмәғәт эшмәкәре Шәһит Хоҙайбирҙин Октябрь революцияһынан һуңғы осорҙа башҡорт совет журналистикаһына нигеҙ һалыусы булараҡ билдәле. 1917-1924 йылдарҙа ғына ул ваҡытта донъя күргән ваҡытлы матбуғатта уның 30-ҙан ашыу публицистика мәҡәләләре, хикәйәләр, очерктар, шиғырҙары донъя күрә. Әҫәрҙәрен ул Башҡорт, башҡорт улы Шәһит, Хоҙай псевдонимдары аҫтында баҫтыра.

Башҡортостан матбуғапты көнө иртәгә Ҡариҙел районында ла билдәләнә. Хәҙер инде йолаға әйләнеп өлгөргән Журналистар һабантуйы, йәғни "Журфест" быйыл йәмле Павловка һыуһаҡлағысы буйында үтә.

Автор: Рафиҡ Әхмәтшин.