Белем биреүҙә алмаш-тилмәш

Баш ҡаланың автотранспорт колледжы студенттар уҡытыуҙа шәхси эшҡыуарлыҡ мөмкинлектәрен файҙалана. Ә бизнес яңы асыштар һәм өҫтәмә хеҙмәт көсө ала. Уҡыу йортоноң ихатаһында ғына асфальт сифатын тикшереү лабораторияһы урынлашыу ҙур уңыш, тип һанай студенттар. Юл япмаһын өйрәнеү, асфальт-бетон ҡатнашмаһы менән эш итеү автотранспорт колледжының уҡыу программаһына инә.

Шуға ла алынған белемде ғәмәлдә һынап ҡарау мөмкинлеге булыуы уҡытыу процесын күпкә еңеләйтә. Студенттар бында төрлө райондарҙан алынған асфальт өлгөләрен тикшерә. Һауа шарттары, тәгәрмәстәр баҫымы йоғонтоһон өйрәнә.

Икенсе һәм өсөнсө курста материалды өйрәнеү фәне инә. Китаптан уҡып белеү бер, ә бына үҙең тотоп, тикшереп, тәжрибә үткәреп ҡарауға етмәй. Лабораторияға дәрестәрҙән тыш та шөғөлләнергә киләбеҙ. Хатта, белгестәр менән юлдарҙа тикшереү үткәрергә лә йөрөйбөҙ.

Полина Ермакова, Өфө автотранспорт колледжы студенты

Лабораторияла асфальт ҡатламын өйрәнеү өсөн бөтә шарттар ҙа бар. Ә бына уҡыу йорто бындай мөмкинлектәр менән маҡтана алмай. Ә тикшереү үҙәге иһә үҙ сиратында яңы көстәр, асыштар һәм инновациялы эш алымдары үҙләштерә. Йәғни, эшҡыуарлыҡ һәм белем биреү өлкәһе бер-береһенә үҫеш өсөн импульс бирә.

Ҡыҙғанысҡа, уҡыу йорто бындай заманса станоктар, стендтар һатып ала алмай. Ә белем биреү технологияларҙан артта ҡалырға тейеш түгел. Был фирма менән хеҙмәттәшлек итеү уҡытыуҙағы етешһеҙлекте йомшағыраҡ кисерергә мөмкинлек бирә. Өҫтәүенә, ул беҙҙең ихатала ғына. Студенттарға практика үтеү өсөн дә йыраҡ йөрөргә кәрәкмәй.

Антон Карташов, Өфө автотранспорт колледжы директоры

Автор: Айнур Кәбиров.