10 июнь көндөҙгө сәғәт икеләрҙә Иглин ҡасабаһындағы Төхвәт Йәнәби урамындағы 27 йортта янғын сыға. Утта өс йәшлек бала һәләк була, йорт хужаһы ауыр тән йәрәхәттәре ала. Әлеге ваҡытта ул Өфөнөң 18 дауаханаһына урынлаштырылған. Хәле ауыр.
10 июндә Иглиндә йәшәгән күп балалы Ғәйфуллиндар ғаиләһе социаль хеҙмәттәр саҡырыуы буйынса Өфөгә циркка килә. Ғаилә һыуҙағы цирк тамашаһының беренсе өлөшөн генә ҡарап өлгөрә. Антракттан һуң Альбина Ғәйфуллина йәшәгән йорттарында янғын сыҡҡан тигән хәбәр ала.
"Әсәлек капиталы"на 2011 йылда төҙөлгән йорттан ошондай харабалар ғына ҡалған. Соланда ут сығып, түбәгә үрләгәнен куршеләре Салауат Кәшфуллин күреп ҡала. Урамда ғәҙәттәгесә, бала-саға күренмәгәс, ишекте шаҡый, йорт эсенән бер кем дә тауыш бирмәй, тышҡы газ кранын ябып, 112 һандарын йыя, ул арала ҡалған күршеләре лә ярҙамға ашыға.
Күп балалы ғаиләгә янғын хаҡында иҫкәртеүсе ҡорамал ҡуйылмаған, ул булһа йорт хужаһы уның тауышын ишекән дә булыр ине бәлки. Соланда ут тоҡандырғыс менән шаярған улын да күрмәгән. Һөҙөмтәлә баланың ғүмере өҙөлә, ирҙең тәненең яртыһынан күберәк өлөшө бешә.
Янғында кесе улын юғатҡан әсә үҙен ҡайҙа ҡуйырға белмәй. Әммә уға артабан да йәшәргә көс табырға, ҡалған өс баланы йортло итергә кәрәк. Әлеге ваҡытта балалар өләсәйҙәрендә йәшәп тора.
Иртәгә янған бина һүтеләсәк, ә яңы йортҡа нигеҙҙе Альбина Ғәйфуллина янғын сыҡҡан ерҙән 3-4 метрға өҫтәрәк ҡорорға ниәтләй. Янғында балаһын юғалтҡан, һәм йортһоҙ ҡалған күп балалы әсә социаль яҡлау бүлеге аша документтар һәм аҡсалата ярҙам юллай. Мәрхәмәтле кешеләр Ғәйфуллиндарға хәленән килгәнсә ярҙам ҡулы һуҙа ала.
Һаҡлыҡ банкындағы иҫәп: 639002069084932209 (Альбина Вакильевна Гайфуллина)
