Башҡортостан Хөкүмәте ауыл хужалығы техникаһы һәм ҡорамалдары һатып алыуға субсидиялар биреү тәртибен раҫланы. Быйыл был маҡсатта 860 миллион һум дәүләт ярҙамы бүленәсәк. Алдағы биш йылда республика ауыл хужалығы предприятиеларына яҙғы сәсеүҙе, урып-йыйыу эштәрен ваҡытында тамамлар өсөн 3200 трактор һәм 50 миллиард һумға комбайн һатып алыу талап ителә.
Башҡортостан Хөкүмәте Премьер-министры урынбаҫары, ауыл хужалығы министры Илшат Фәзрахманов үҙ сығышында аграрийҙарға продукцияны урында уҡ етештереү мөмкинлеген, баҫыуҙан - тура баҙарға сығыу юлдарын яйлау мәсьәләһенә туҡталды. Ведомство етәксеһе әйтеүенсә, был маҡсатта ауыл хужалығы предприятиеларына продукцияларын һаҡлау, ҡаптарға тултырыу өсөн махсус ҡорамалдар һатып алыу кәрәк. Республика бюджетынан бүленәсәк субсидиялар ошо маҡсатта ҙур ярҙам булмаҡсы.
