Нәҫел-нәсәбә сылбырын төбәктә йәшәүсе Әхмәтшиндар, Абҡадировтар һәм Мағазовтар барланы. Бер нәҫелдән таралған балаларҙы уртаҡ майҙанға йыйыу төрлө сәбәптәр арҡаһында өҙөлөп торған туғанлыҡ ептәрен нығытырға мөмкинлек бирҙе.
Ихлас ҡосаҡлашыу, күҙ йәштәре. Оҙаҡ күрешмәгән туғандарҙы шәжәрә бер майҙанға йыйҙы. Нәҫел тамырҙары тотош Рәсәйгә таралған. Байрам тормош мәшәҡәттәрен ситкә ҡалдырып, кесе ватанға ҡайтыу, туған яҡ һауаһын һулау өсөн сәбәп тә булды. Байрамға алыҫ Себер тарафтарынан да ҡунаҡтар килеп етте.
Шәжәрә байрамына 19 быуат урталарында Иҙел башында йәшәгән Әхмәтша исемле уҙамандың балалары йыйылды. Әле уларҙың фамилиялары төрлө булыуға ҡарамаҫтан, аталары бер. Нәҫел көслө, тамырҙары тәрән.
Шәжәрә байрамын уҙғарыу өсөн нәҫел ағасын тергеҙергә тура килгән. Архивта ете быуын ата-бабаларҙың исеме генә түгел, олатайҙарҙың ырыу тамғалары ла табылған. Улар нигеҙендә тарихи ысынбарлыҡ асыҡланған.
Быуаттар төпкөлөнә һуҙылған шәжәрә ағасын ҡоротмау, уны йәш быуынға еткереү хәҙер беҙҙең төп бурыс, тип билдәләй байрамды ойоштороусылар.
Йәмле Йәндек һыртында, Бүртәй йылғаһы буйында ойошторолған байрам уйын-көлкө йыр-моң менән үрелеп барҙы. Туғандар биш йылдан йәнә шәжәрә байрамында осрашырға һүҙ ҡуйышып таралышты.
