Өфө районының Михайловка ауылы эргәһендә уҙғарылған сара иллегә яҡын малай-ҡыҙҙы уйынға йыйҙы. Улар өсөн ойошторолған сағыу тамашала ата-әсәләр ҙә, "өсөнсө быуын" вәкилдәре лә әүҙем ҡатнашты.
Саф һауа, тәбиғәт ҡосағы, сағыу ҡояш. Йылға яры буйы шат балалар тауышына күмелгән. Һабантуй майҙанын хәтерләткән урында ҡыҙҙар-малайҙар арҡан тартыша, фильм геройҙары костюмын кейеп үҙҙәренә үк тамаша ҡуя. Мөмкинлектәре сикләнһә лә, уйында ҡатнашырға сик юҡ, теләк кенә булһын. Ә ойоштороусылар балалар үҙҙәрен иркен тотһон өсөн тырышҡан, ситтә ҡыйынһынып, күҙәтеп тороусылар булмай сыҡты.
Байрамға Өфөнөң алты районынан иллегә яҡын бала килде. "Нептун" көнөндә улар йыр-бейеүгә һәләтен, йомаҡ сисеүҙә отҡорлоҡтарын күрһәтте. Сарала ҡатнашыусылар ҡағыҙҙан оригами ысулы менән аҡҡош, кәмә эшләп һыуға ағыҙҙы. Ойоштороусылар әйтеүенсә, һәр байрам балаларҙы йәмғиәткә яраҡлаштырыуҙа ҙур роль уйнай.
Сара ҡаланың инвалидтар ойошмаһы тарафынан уҙғарыла. Алдағы йылдарҙа улар "Атай, әсәй һәм мин" ғаилә, спорт байрамдарын үткәргән. Киләһе көндәрҙә лә мөмкинлектәре сикләнгән кешеләр өсөн ҡыҙыҡлы проекттар әҙерләнә.
Июлдә ойошма Ишембай районына сәйәхәткә сығырға ниәтләй. Ике көнгә иҫәпләнгән программа ла оло йәштәгеләр ҡатнаша. Улар төбәктең тарихи урындарын күреп, ауыл халҡы менән аралашып, йорт эштәрендә ярҙамлашырға теләй.
Йылға буйында байрам киске сәғәттәргә тиклем дауам итте. Ҡатнашыусылар тәбиғәттә ҡайнар сәй, йылы аш менән һыйланды. Ә иң мөһиме барыһы ла яҡшы тәьҫораттар алды.
