Был турала Башҡортостандың Үҙәк һайлау комиссияһы рәйесе Хәйҙәр Вәлиев матбуғат конференцияһында белдерҙе. Һайлау алды кампанияһы бөгөндән башлана. Ә тауыш биреү көнө 9 сентябргә тәғәйенләнгән. Һайлауҙы үткәреүҙә артыҡ үҙгәрештәр юҡ, тауыш биреүселәр һаны шул уҡ кимәлдә.
Сәйәси компанияла ҡатнашыусыларға килгәндә, Дәүләт Йыйылышы -Ҡоролтайға 110 депутат һайлау ҡаралған. Уларҙың яртыһы бер мандатлы округтар, ҡалғандары партия исемлеге буйынса үтә. Хәйҙәр Вәлиев әйтеүенсә, был сәйәси кампанияла ла заман технологияларын әүҙем ҡулланыу, 811 һайлау участкаһына КОИБтар урынлаштырыу ҡарала. Был маҡсатҡа 12 миллион һум аҡса талап ителә. Ә бына видеокамералар урынлаштырыу артыҡ ҡиммәткә төшәсәк.
Бөгөн шулай уҡ республикала теркәлгән партия ағзалары ултырышы үтте. Улар республикала 52. Шулай ҙа егермегә яҡыны ғына әүҙемлек күрһәтә, ти Үҙәк һайлау комиссияһы ағзалары. Алтынсы саҡырылышта ла даими нигеҙҙә эшләгән депутаттар иҫәбе әлегесә ҡала, 18 кеше. Кандидаттар исемлегенә индерелеүселәр 84 кешенән аҙ һәм 176-нан күп булырға тейеш түгел. Партия вәкилдәренә быйылғы үҙенсәлектәрҙе иҫәпкә алып теркәлеү тәртибе өйрәтелде.
