һуңғы арала төрлө матбуғат сараларында ошондай исем аҫтындағы име-мимеш йышайҙы. Интернет сығанаҡтарҙа әйтелеүенсә, киләһе айҙан илдәге банктар һалым хеҙмәтенә физик шәхестәрҙең карталарындағы аҙымдар тураһында барлыҡ мәғлүмәтте тапшырып торорға тейеш. Йәнәһе лә, аҡса күсереү өсөн отчет бирергә тура килә, ә инде танылмаған аҡса күсереү осраҡтары бөтөнләй ҙә килем булараҡ баһаланасаҡ һәм уға һалым түләргә тура киләсәк.
Әммә эксперттар был мәғлүмәтте инҡар итә. Ысынында үҙгәрештәр ҡиммәтле металдарға ғына ҡағыла. Ошо йылдың 1 июненән банктар һалым органдары талабы буйынса ҡиммәтле металдар иҫәптәрендә ҡалған һәм күсерелгән аҡсалар буйынса белешмәләрҙән тыш, уларҙың иҫәптәре буйынса ла справкалар тапшырырға тейеш. Белгестәр граждандарҙы тынысландырырға ашыға, бындай күҙәтеү өсөн ҡырҡа сәбәптәр булыуы мөһим.
