Был үҙ сиратында һыуҙа фажиғәле хәлдәрҙең артыуына килтереүе ихтимал. Йыл башынан республиканың һыу объекттарында ете үлем осрағы теркәлгән. Шул уҡ ваҡытта, батып үлеүселәр уҙған йылдың ошо уҡ осоро менән сағыштырғанда, ике тапҡырға аҙыраҡ. Хәлдең ыңғай яҡҡа үҙгәреүен белгестәр май-июндә һауа торошоноң һыуыҡ тороуы менән аңлата.
Ғәҙәттән тыш хәлдәр министрлығының Башҡортостан буйынса баш идаралығынан хәбәр итеүҙәренсә, быйыл республикала рәсми рәүештә 75 пляж эшләйәсәк, уларҙың ике тиҫтәгә яҡыны балалар һауыҡтырыу учреждениеларында урынлашҡан. Әммә халыҡтың күбеһе йыһазландырылмаған урындарҙа һыу инергә яратыуы ҡотҡарыусыларҙы хафаға һала. Сөнки статистика буйынса, йылға-күлдәрҙәге фажиғәле хәлдәрҙең 90 процентҡа яҡыны тап ошондай рөхсәт ителмәгән пляждарҙа теркәлә. Шулай уҡ эскән килеш һыу инеүселәр ҙә йыш ҡына фажиғәгә тарый.
