Шәмбе Өфө районында "Геройҙар уҙышы" тип исемләнгән ярыш үтте

Федераль кимәлдәге сара бер ай элек тә ойошторолғайны. Сираттағыһында ҡыйыуҙар өсөн тағы ла мауыҡтырғыс һынауҙар көтөлә. Бөгөн ҡаршылыҡ һыҙатында тест-драйв уҙғарылды.

Артур Сәйетгәрәев һыуҙағы этапты тәүгеләрҙән булып үтте. Егет өсөн ул еңел бирелмәне. Сөнки финишҡа яҡынлашҡан һайын тын бөтә. Шуға күрә дөрөҫ һулыш алырға ла кәрәк.

Был ҡаршылыҡ һыҙатын беренсегә үттем. Тәьҫораттар яҡшы. Иң мөһиме уяу булырға кәрәк, ашығырға ярамай. Сөнки тиҙлеккә йөҙгәндә тулҡындар барлыҡҡа килеп, һыуҙан тонсоғоу хәүефе бар.

Артур Сәйетгәрәев, "Геройҙар уҙышы"нда ҡатнашыусы

Йөҙөү буйынса ярышҡандан һуң, спортсыларға батҡаҡ буйлап шыуышырға ла тура киләсәк. Шулай уҡ шина покрышкаларынан яһалған тар тоннель аша үтеү, арҡан буйлап күтәрелеү кеүек ҡаршылыҡ һыҙаттары бар. "Геройҙар уҙышы"нда ҡатнашыусылар бейектән өс метр тәрәнлектәге бассейнға ла һикерәсәк. Был ярышта яңғыҙ ҙа, шулай уҡ алты кешенән торған команда менән дә сығыш яһарға була.

Автор: Гөлназ Хәйбуллина.