Ул Бөйөк Еңеүҙе яҡынайтыу өсөн бар көсөн һалған ҡатын-ҡыҙҙарҙың һәм балаларҙың хеҙмәтен данлай. Ниәтте бойомға ашырыр алдынан урындағы ветерандар ойошмаһы бер нисә һәйкәл проектын тикшерә. Һөҙөмтәлә улар төбәккә хас булған, шул осорҙағы кейемдәр сағылыш тапҡан, балаларҙың башаҡ йыйған ваҡытын күҙәләндергән стелаға өҫтөнлөк бирә.
Һәйкәлде асыу тантанаһы хәтер һәм ҡайғы көнөнә тура килде. Сығыш яһаусылар билдәләүенсә, йылдан-йыл тыл хеҙмәтсәндәренең дә, һуғыш осоро балаларының да сафы һирәгәйә, күптәре олпат йәштә. Быуындары ла нығынып өлгөрмәгән үҫмерҙәр ололар менән бер рәттән колхоз-совхоз эшенә егелә. Ағыуланған башаҡ ашап үлеүселәр ҙә була. Әммә был ауыр йылдарҙа барыһы ла "Бөтәһе лә фронт өсөн, бөтәһе лә еңеү өсөн!" лозунгы аҫтында эшләй.
Асҡарҙың үҙәк урамдарының береһендә, район китапханаһы янында барлыҡҡа килгән был тарихи һәйкәл янына килеп, һәр кем ҡулына ураҡ, көрәк, һәнәк тотоп үҫкән быуынға, ир-егеттәр урынына ауыр эшкә егелгән ҡатын-ҡыҙҙарға баш эйер, уларҙың фиҙаҡәр хеҙмәтен хөрмәтләп телгә алыр. Йәш быуында улар өсөн ғорурлыҡ тойғоһо уяныр, илһөйәрлек һәм ватансылыҡ сифаттары тәрбиәләнер тигән теләктә әбйәлилдәр.
