Благовещен районы Арҡауыл ауылында Бөйөк Ватан һуғышы яугирҙарына һәйкәл асылды

Әһәмиәтле сара "Бөтәһен дә исемләп иҫләйбеҙ" проекты сиктәрендә ойошторолдо. Был проект ата-бабаларыбыҙҙың хәрби ҡаһарманлығын мәңгеләштереүгә һәм йәш быуында патриотик ҡараш тыуҙырыуға йүнәлтелгән. Обелискты асыу тантанаһына бик күп халыҡ йыйылды.

Сығыш яһаусылар билдәләүенсә, Арҡауыл ауылында йәшәүселәр изге эшкә әүҙем ҡушылған. Улар тыуған ил азатлығы өсөн йәнен-тәнен аямаған яҡташтарын, шул уҡ ваҡытта тыл хеҙмәтсәндәрен бер ваҡытта ла онотмай. Төбәк Бөйөк Ватан һуғышына үҙенең илле улын оҙатҡан. Әммә ир-аттарҙың барыһына ла тыуған төйәктәренә иҫән-һау әйләнеп ҡайтырға яҙмай.

Мәрмәрҙән эшләнгән плиталарҙың береһенә яуҙа башын һалғандарҙың, икенсеһенә еңеү менән ҡайтыусыларҙың исем-шәрифтәре яҙылған. Ә уртала совет һалдатының каскаһы урынлаштырылған.

Автор: Илдар Байбулатов.