Башҡортостан Яҙыусылар Союзында яңы ағза

Эстонияла йәшәп ижад итеүсе яҡташыбыҙ Дина Гаврилова ошо көндәрҙә республика әҙәбиәтселәре исемлеген тулыландырҙы. Тиҫтәгә яҡын китап авторы тыуған яғына яңы әҫәренең исем туйын үткәреү өсөн дә ҡайтҡан. Теманың дауамын беҙҙең сайтта уҡығыҙ.

Һин барыһынан да яҡшыраҡ! Дина Гаврилованың яңы китабының исеме Башҡортостан төйәгенә һөйөү һүҙҙәре булып яңғырай. Инде күп йылдар Эстонияла йәшәгән Дина Гаврилованың барлыҡ әҫәрҙәре лә тыуған ере, яҡташтары тураһында.

Мине Башҡортостан менән бәйләгән тамырҙар бик көслө. Тыуған яғымды, уның күркәм тәбиғәтен, туғандарымды һағыныу Башҡортостан тураһында яҙырға мәжбүр итә лә инде. Донъя күргән алты китабым араһында бер әҫәрем генә Эстонияға арналған. Унда ла төп геройҙың яҙмышы Башҡортостанға бәйле.

Дина Гаврилова, яҙыусы

Яңы китап яҙыусының "Һалҡын йылдар" төҫтәре романының дауамы. Бишбүләк районының Кесе Мәнәүез ауылы кешеләренең тормошон автор сыуаш ҡыҙы Еля -Еликаниданың тарихы аша һүрәтләй.

Рәшит Солтангәрәевтың бер әйткән һүҙе бар. Мин ҡаҙаҡ яҙыусыһын уҡыйым икән, ҡаҙаҡты күҙ алдына килтерергә тейеш, эстон яҙыусыһы китабын ҡулға алһам - эстондарҙы. Сыуаш яҙыусыһының китабы ла сыуаш халҡының тормошон һүрәтләргә тейеш. Был эш Динаның ҡулынан килгән.

Лариса Абдуллина, шағирә, Башҡортостанда "ЛиФФТ" журналының баш мөхәррире

Ошо көндәрҙә Дина Гаврилова Бишбүләк һәм Бәләбәй райондарында яңы китабының исем туйын ойошторҙо. Динаның әҫәрҙәре республика матбуғатында, шулай уҡ Башҡортостанда сыҡҡан Бөтә Рәсәй "ЛиФФТ" журналында ла донъя күреп тора. Илһам сығанаҡтарын да Дина Гаврилова башҡорт ерендә ала.

Автор: Гөлдәриә Йосопова.