Йылғала башлыса ир-егеттәр бата

Уҙған тәүлек эсендә генә водолаздар һыуҙан өс кешенең кәүҙәһен сығара. Салауат районындағы Йүрүҙән йылғаһында 16 йәшлек үҫмер, Саҡмағош районында быуала 18 йәшлек егет һәм Ағиҙел йылғаһында 27 йәшлек Дүртөйлө егете һәләк булған. Шулай уҡ был аҙнала Белорет, Мәләүез, Әлшәй райондарында йылғала батыу осраҡтары теркәлгән.

Хәүеф зонаһында башлыса көслө заттар. Былтыр 93 һәләк булыусының 86 проценты ир-егеттәр булһа, быйыл был күрһәткес 73 процент. Фажиғәле осраҡтарҙың төп сәбәбе - эскән килеш һәм рөхсәт ителмәгән урындарҙа һыу инеү.

Иҫегеҙгә төшөрәбеҙ, быйыл йәй республика һыу ятҡылыҡтарында 75 йыһазландырылған пляж эшләй, уларҙың 19-нда балалар һауыҡтырыу учреждениелары урынлашҡан.

Һыу инеүгә тәғәйенләнгән пляждарҙа һәр ваҡыт ҡотҡарыусылар ҡарауыллай. Быйыл Өфө ҡалаһында ғына ҡотҡарыусылар дүрт кешенең ғүмерен һаҡлап ҡалды. Ял көндәрендә һыу буйында ял итеүселәр һаны күбәйәсәк. Фажиғәле осраҡтар тыумаһын өсөн һәр ваҡыт һыуҙа хәүефһеҙлек сараларын үтәгеҙ.

Фәрит Ғүмәров, Башҡортостандың ғәҙәттән тыш хәлдәр буйынса дәүләт комитеты рәйесе

Автор: Гөлназ Хәйбуллина.