Әй йылғаһы буйында республиканың 21 районынан ике йөҙгә яҡын ҡатнашыусы йыйылды. Тәбиғәт ҡосағында ойошторолған туристик слет ун дүрт йәштән өлкәнерәктәрҙе берләштерҙе. Күптәр инвалид коляскаһында булыуына ҡарамаҫтан, тормош алдында һынып ҡалмай, спорт менән әүҙем шөғөлләнә.
Улар фигуралы йөрөү буйынса ярышта ҡатнашты. Шулай уҡ башҡа дисциплиналар буйынса еңеүселәр асыҡланды. Йәйәүләп атлау техникаһы, һыу туризмы, карта һәм компас ярҙамында урынды билдәләү, стена гәзитен әҙерләү һәм кулинар конкурстар үткәрелде. Хәйбулла районынан "Дала бөркөтө" командаһы бындай күләмле спорт сараһында тәүгә генә ҡатнашмай, йыл да призлы урындар яулайҙар.
