Быйыл унда ун биш район вәкилдәре нәҫел тамырҙарын барланы. Һабантуйға тура килгән сарала шулай уҡ "Башҡорт килене", "Ғаиләм-ҡәлғәм", "Ялан ашы" бәйгеләре лә ойошторолдо. Байрам барышы тураһында беҙҙең сайтта уҡығыҙ.
Баймаҡ районы Түбәнге Яйыҡбай ауылынан Хәсәновтар ғаиләһе республиканан ситтә лә билдәле. Уларҙа туғанлыҡ, берҙәмлек төшөнсәһе көслө. Олоһо ла, кесеһе лә сәхнәнән айырылғыһыҙ, башҡорт мәҙәниәтенә ғашиҡ. Төбәктә 80 кешенән торған берҙән-бер халыҡ ғаилә ансамбле Балтас районында үткән шәжәрә байрамында ла ҡатнашып, сираттағы еңеүен яуланы.
Байрамда төрлө милләт халыҡтары үҙҙәренең шәжәрәләре менән таныштырҙы. Илһөйәрлек, толерантлыҡ һәм татыулыҡҡа әйҙәгән сара - быуындар араһындағы бәйләнеште нығытты.
"Шәжәрә" байрамы ике көн дауам итте. Башта бәйгелә ҡатнашыусылар район мәҙәниәт һарайында үҙҙәренең ижади һәләттәрен күрһәтһә, икенсе көн һайлап алыу этабы еңеүселәре халыҡ алдында сығыш яһап, барса халыҡты тарихты өйрәнергә әйҙәне.
Балтастар һабантуй яланында ҡунаҡтарҙы йылы ҡабул итте. Шәжәрә байрамында - район халҡы үҙҙәре үк күпләп ҡатнашҡан.
Шәжәрә байрамынан тыш, урында "Ғаиләм-ҡәлғәм", "Башҡорт килене" бәйгеләре үтте, ир-егеттәр "Ялан ашы"н әҙерләп күрһәтте. Һабантуй яланы - туғанлыҡ, дуҫлыҡ төшөнсәләрен нығытты.
