Статистика күрһәткестәре буйынса Башҡортостанда ун көн эсендә генә 15 кеше батып һәләк булған. Граждандарҙы һаҡлау идаралығы белгестәре Өфөләге һыу инеү урындарына рейдҡа сыҡты.
Баш ҡаланың йыһазландырылмаған пляждарында ял итеүселәр әҙ түгел. «Һыу инеү тыйыла» тигән иҫкәртеү ҡуйылһа ла Өфө халҡы уны иҫәпкә алырға теләмәй. Ҡала пляждарын тикшерергә сыҡҡан белгестәр һыу буйында ял итеүселәрҙе хәүеф хаҡында берәм-берәм тигәндәй иҫкәртеп сыҡты. Махсус листовкалар ҙа таратты. Әммә был алым мәсьәләне хәл итмәй күрәһең, йәкшәмбе көндө генә бында һыу инергә йөҙҙән ашыу кеше килгән.
– Ял көндәрендә йылға буйында халыҡ ҡайнап тора. Әлбиттә, был урынды лә йыһазландырылған, таҙа итеп күрге килә. Бындай эҫелә һыу инеү өсөн йыраҡҡа йөрөгө килмәй, - ти тыйылған урында һыу инеүсе Дмитрий Бочкарев.
Ғәҙәттән тыш хәлдәр министрлығы иҫкәртеүенсә һыу инеү миҙгелендә хәүефһеҙлек ҡағиҙәләрен теүәл үтәү мотлаҡ. Бигерәк тә балаларҙы айырым контролгә алыу һәм уларҙы ҡарауһыҙ ҡалдырмау мөһим. Һауа торошо боҙолған саҡта ҡотҡарыусылар һыу инеүҙән бөтөнләй баш тартырға кәңәш итә.
