Был турала бөгөн Республика Башлығы һәләтле балаларға булышлыҡ итеүгә арналған кәңәшмәлә белдерҙе. Эште системалы алып барыу, шарттар тыуҙырыу мотлаҡ, тине Рөстәм Хәмитов. Кәңәшмәлә күтәрелгән проблемалар хаҡында хәбәрсебеҙ Рәмзиә Кәримова репортажы.
Һәләтле балалар тигән төшөнсә күп яҡлы, бында һүҙ бер йүнәлеш хаҡында ғына бармай. Берәүҙәрҙең уҡыуға, икенселәрҙең ижадҡа, өсөнсөләрҙең спортҡа ынтылышы булыуы мөмкин. Тик уларҙы асыҡлау, үҫтереү шарт. Был үҙенә күрә инвестиция, бөгөн республика балаларға булышлыҡ итһә, бер нисә йылдан улар төбәк иҡтисадын күтәрәсәк.
Рөстәм Хәмитов әйтеүенсә, совет заманындағы һымаҡ автор мәктәптәре кәрәк, улар белем биреүҙең яңы форматтарын индерергә булышлыҡ итәсәк. Тағы бер йүнәлеш - олимпиада хәрәкәтен йәнләндереү. Кәңәшмәлә ҡатнашыусы йәштәр фекеренсә, республика үҙәге ойошторорға һәм халыҡ-ара кимәлгә сығырға мөмкин.
Еңеүселәр тәрбиәләгән педагогтарҙы дәртләндереү, балаларға һәләттәрен асыу өсөн шарттар тыуҙырыу, үҫергә булышлыҡ итеү, мәктәп-вуз бәйләнешен нығытыу һәм башҡалар. Уңайлыҡтар тигәндә заман технологияларын үҙләштереү ҙә күҙ уңында тотола. Мәҫәлән, белем усаҡтарында киң һыҙатлы интернетты индереү. Был уҡыусыларға мәғлүмәт алыу ваҡытын күпкә ҡыҫҡартасаҡ.
Фекер алышыу барышында Башҡортостан сириусы, йәғни һәләтле балаларҙы туплау, йәйге ялын ойоштороу мәсьәләһе лә күтәрелде. Өфө эргәһендәге "Йондоҙсоҡ" лагеры базаһында йыл әйләнәһенә эшләгән үҙәк асырға мөмкин. Тәҡдимдәр бөтәһе лә урынлы. Рөстәм Хәмитов белдереүенсә, һәләтле балалар менән эшләү комплекслы ҡараш талап итә. Улар барыһы ла концепцияла сағылыш табырға тейеш.
Һәләтһеҙ балалар юҡ, уларҙы тик ваҡытында күрә, үҫтерә белергә генә кәрәк. Ә был эҙмә-эҙлекле, системалы эшмәкәрлек талап итә. Республика башлығы һәләтле балаларға булышлыҡ итеү буйынса дөйөм концепцияны ғәмәлгә индереү бурысын ҡуйҙы.
Рәмзиә Кәримова
