Бәхет өсөн күп кәрәкмәй

Мөхәббәт таш ярҙырта, тигән мәҡәл бар халыҡта. Бөгөн Октябрьский ҡалаһы ҡарттар һәм инвалидтар йорт-интернатында бер юлы ике пар законлы никахҡа инде. Йәш ғаиләләрҙе хәбәрсебеҙ Флорида Ким ҡотланы.

Мөхәббәт шаярмай, ул бит яндыра тип хистәре менән уртаҡлаша бәхетле парҙар. Октябрьский ҡалаһында урынлашҡан ҡарттар һәм инвалидтар йортонда 430 кеше араһында Радмила менән Рәмил бер-береһенә ғашиҡ була. Бөгөнгө тантана улар өсөн күп йылдар хыял булып ҡына һаҡланған көн.

Радмила Садиҡова: «Бөгөнгө көн өсөн бөтә кешегә рәхмәт әйткем килә, беҙҙе булышыуығыҙ өсөн. Иң бәхетле көн. Таныштыҡ өс йыл элек. Ул әйбәт, гел миңә ярҙам итә.»

Ситтән ҡарағанда, кәләш менән кейәү ҡәҙимге пар. Әммә был йорт-интернатта тәрбиәләнеүселәрҙең тормошо ябайҙан түгел, ауыр һынауҙар аша үткән. Радмилаға бәләкәй саҡта уҡ церебраль фалиж диагнозы ҡуйыла, ә уның тормош иптәше Рәмилдең күҙҙәре насар күрә. Тик йәштәр өсөн был кәртә түгел. Радмила француз телен өйрәнә, бәйләргә, сигергә ярата. Рәмил иһә спорт менән шөғөлләнә.

Нәйлә Баһауетдинова, Октябрьский ҡалаһының ҡарттар һәм инвалидтар йорт-интернаты директоры: «Бында килеп эләккәндәрҙең күҙҙәрендә ниндәйҙер ҡайғы, ышанысһыҙлыҡ бар ине. Нисек йәшәрмен тигән уйҙар менән киләләр. Бында уларға айырым бүлмәләр бирелә, санитаркалар ярҙам итә, бер-береһенә терәк булып йәшәйҙәр. Шуға интернатта тормош ҡороп йәшәүҙәренә бик шатбыҙ.»

Етәксе әйтеүенсә, интернатта йәшәүселәр араһында ғаилә ҡороу тәүгеһе түгел. Һуңғы туғыҙ йылда һигеҙ пар законлы никахҡа ингән.

Әнис Мөхәмәтйәнов һәм Рүзилә Аҡмырҙина, Октябрьский йорт-интернатында йәшәүселәр: «Беҙ хәҙер өсөнсө йыл торабыҙ бында. Башта танышып йөрөнөк, шунан егерменсе ғинуарҙа өйләнештек. Ошо комнатаны бирҙеләр беҙгә. Бергә йәшәйбеҙ, татыу йәшәйбеҙ, беҙҙе гел маҡтайҙар. Иң мөһиме - икебеҙ характер менән тура килдек.»

Никахға йыйылған ҡунаҡтар араһында тик интернат хеҙмәткәрҙәре. Улар ғаилә ҡороусылар өсөн атай-әсәй ҙә, ҡәйнә-ҡайны ла. Тормошта күп һынауҙар үткән, интернат тәрбиәләнеүселәре кәйефен бер ниндәй ҙә һикәлтә лә боҙа алмаҫ.

Флорида Ким