Благовещенда ҡала көнө уңайынан ярыммарафон уҙғарылды

Благовещенда ҡала көнө билдәләнде. Байрамға төбәктә йәшәүселәр генә түгел, бөтә республика халҡы әүҙем ҡушылды. Биш йөҙҙән ашыу спортсы икенсе йыл рәттән ҡала көнө уңайынан уҙғарылған ярыммарафонда ҡатнашып, үҙ көсөн һынаны.

Эҫе һауа шарттарына ҡарамаҫтан, Благовещен урамдары буйлап йүгерергә сығыусылар алдағы йылдарҙан 30 процентҡа күберәк. Ойоштороусылар төрлө ҡатмарлыҡтағы өс дистанция әҙерләгән. Спортсылар 2, 7 һәм 21 саҡрым арауыҡҡа йүгерҙе. Ҡатнашыусылар әйтеүенсә, сара Өфөлә уҙасаҡ халыҡ-ара марафонға ныҡлы әҙерлек булып тора. Баш ҡалала спорт бәйгеһе 2 сентябргә тәғәйенләнгән. Дүрт дистанцияла бөтә Рәсәйҙән йыйылған өс меңләп еңел атлет үҙ көсөн һынаясаҡ.

Михаил Кондров, ярыммарафонда ҡатнашыусы: «Стәрлетамаҡтан килдем. Ярыммарафонға ныҡлы әҙерләнеүем 7 саҡрым арауыҡта беренсе килергә булышлыҡ итте. Бәйге барышында көйәрмәндәр ҙә дәртләндереп торҙо.»

Ульяна Шарикова, ярыммарафонда ҡатнашыусы: «Бындай эҫелә йүгереү, әлбиттә, еңел түгел. Шуға ҡарамаҫтан кәйеф шәп. Спортсылар өсөн бөтә уңайлыҡтар булдырылған. Һалҡын душ, фекер алышыу майҙансығы.»

Благовещенда ҡала көнө уңайынан шулай уҡ баскетбол ярышы, оҫталыҡ дәрестәре ойошторолдо. Һәр кем күңеленә ятҡан шөғөл тапты, берәүҙәр кино ҡарап кинәнһә, бәләкәстәр ата-әсәләре менән коляскалар парадында ҡатнашты. Байрам бай йөкмәткеле концерт менән тамамланды.

Автор: Ф. Юланова