Башҡортостан етәксеһе Радий Хәбиров ике туғандаш республиканың девизын ошолай билдәләне. Өфөлә Татарстан көндәре рәсми асылды. "Башҡортостан" дәүләт концерт залында тантаналы ултырыш үтте. Унда ике республика етәкселәре Радий Хәбиров һәм Рөстәм Миңлеханов ҡатнашты.
"Беҙҙең республикала татар халҡы йолаларын һаҡлау өсөн бөтәһе лә эшләнә", - тине Башҡортостан етәксеһе Радий Хәбиров.
Татарстан президенты Рөстәм Миңлеханов Башҡортостан халҡын 100 йыллыҡ юбилей менән ҡотланы һәм артабан да дуҫ-татыу йәшәргә өндәне.
Республика етәкселәре ике төбәк үҫешенә ҙур өлөш индергән мәғариф, бизнес, сәнғәт эшмәкәрҙәренә дәүләт наградалары һәм бүләктәр тапшырҙы. Тантана Татарстан сәнғәт оҫталары концерты менән тамамланды.
Фотоһүрәт : Башҡортостан Башлығы сайтынан алынды.
