Ҡойола башлаған стеналар, тимер киҫәгенә әйләнгән почта йәшниктәре, һерәйеп торған сымдар. СССР-ҙың 50 йыллығы урамындағы 47-се йорт хужалары йылдар дауамында ошондай шарттарҙа йәшәй. Подъезда ремонт үткәрелгәне лә юҡ. Төҙөкләндереү өсөн байтаҡ сығымдар талап ителә.
Йорттоң 11 подъезында ла ошондай күренеш. Фатир хужалары ярҙам һорап республика етәксеһе Радий Хәбировҡа мөрәжәғәт иткән. Социаль селтәрҙәрҙә фотоһүрәттәр һалып хәлде аңлатып биргән. Ялыу "Инцидент" системаһына эләгә һәм Октябрь районы хакимиәтенә йүнәлтелә.
Октябрь проспектындағы был йортта йәшәүселәр баҫҡыстар таушала башлауына ризаһыҙлыҡ белдерә. Мөрәжәғәттә улар оло йәштәге ҡатындың ҡолап аяғын һындырыуын да яҙған.
Мөрәжәғәт тиҙ арала ҡарала. Баҫҡыстан хәҙер ҡурҡмайынса төшөргә мөмкин. Әммә йорттағы проблемалар бының менән генә бөтмәй әле.
Инцидент ярҙамында урында йәшәүселәр властарҙың иғтибарын йәлеп иткән. Уларҙың йорто подъездарҙы ремонтлау буйынса республика программаһынга индерелгән. Хәҙер фатир хужаларына бергә тупланып башҡарыласаҡ эштәрҙе билдәләргә генә ҡала.
Октябрь районы баш ҡаланың иң ҙур муниципалитеты. Инцидент системаһы көн дә районда йәшәүселәрҙән 20-гә яҡын мөрәжәғәт ҡабул итә. Уларҙы эшкәртеү менән махсус төркөм шөғөлләнә. Декабрь башынан алып хеҙмәткәрҙәр өс йөҙгә яҡын ялыу ҡабул итеп ыңғай яуап биргән. Уларҙың күпселеге тап подъездарға ҡағыла. Республикалағы барлыҡ подъедарҙы ла тәртипкә килтереү өсөн 6 миллиард һум аҡса тотоноласаҡ.
Төҙөкләндереү программаһы стеналарҙы буяу ғына түгел. Ремонт комплекслы башҡарыласаҡ. Әйткәндәй, ниндәй эштәр талап ителгәнлеген, хатта, стеналарҙың ниндәй төҫтә буласағын да, йортта йәшәүселәр үҙҙәре хәл итәсәк.
