Благовар районы үҙәге Языков ауылынан Наталья Яковлева тураһында яҡташтары әүем замандашыбыҙ тиергә күнеккән. Үҙе йәшәгән ихатала көнкүреш ҡалдыҡтыры өсөн контейнер булмауына ла ул күҙ йомоп ҡарамаған. Социаль селтәрҙә яҙған. Борсолоу белдереүе бушҡа булмаған. Мәсьәлә тиҙ арала хәл ителгән.
Благовар районы буйынса төбәк операторы итеп Өфөнөң махсус автохужалыҡ предприятиеһы тәғәйенләнгән. Сүп-сар реформаһы үҙ көсөнә инеү менән көнкүреш ҡалдыҡтарын йыйыу машиналары район үҙәге урамдарына ғына түгел, төпкөл ауылдарға ла барып етә,- ти урындағы хакимиәт вәкилдәре. Етешһеҙлектәргә килгәндә уларҙы бөтөрөү буйынса эҙмә-эҙлекле эш башҡарыла. Район үҙәгенең төп урамдарына сүп-сар контейнерҙары күптән ҡуйылған.
Сүп-сар реформаһы иң төпкөлгә лә барып етергә тейеш, тип билдәләй район етәкселеге. Әлегә тиклем көнкүреш ҡалдыҡтары бөтөнләй сығарылмаған ауылдарға ла хәҙер төбәк операторҙары барып етә. Районда барлығы 167 контейнер урынлаштырылған. 2019 йылдың июленә тиклем улар етешмәгән барлыҡ ауылдарҙа ла ҡуйылырға тейеш.
Әлбиттә, өҫтөнлөк сүп-сар контейнерҙарына бирелә. Әммә ҡаты көнкүреш ҡалдыҡтары махсус ҡапсыҡ ярҙамында йыйылған урамдар ҙа бар Языков ауылында. Бындай урындарҙан төбәк операторы машиналары алдан билдәләнгән график буйынса үтә.
Рәмзиә Мосабарова Иглин районы үҙәгендә йәшәй. Хаҡлы ялда. Донъя көткәс, сүп тә сыға, шөкөр хәҙер таҙартып торалар тип шатлана оло йәштәге ханым.
Иглин районы үҙәгендә лә әлегә тиклем көнкүреш ҡалдыҡтары менән хәл башҡасараҡ ине. Ауыл уртаһындағы рөхсәтһеҙ сүплектәр оҙаҡ ваҡыт урындағы халыҡтың маҙаһына тейҙе. Әммә әле үҙгәрештәр һиҙелерлек. Тау-тау сүп өйөмдәре таҙартыла. Көнкүреш ҡалдыҡтары өсөн контейнерҙар ҡуйыла. Белгестәр фекеренсә, был күренеш тәү сиратта ҡануниәттәге үҙгәрештәр һәм битараф булмаған кешеләрҙең социаль селтәрҙәге әүҙемлеге менән бәйле.
Иглин районы хакимиәтенең "Инцидент" системаһы өсөн яуаплы белгесе Миләүшә Хәсәнова әйтеүенсә лә, төбәктә сүп-сар сығарыу мәсьәләһе мөрәжәғәттәр араһында беренсе урынды биләй. Әммә үҙләштерелгән заманса эш алымы власть вәкилдәренә тынғылыҡ бирмәй. "Инцидент" социаль селтәрҙә халыҡ мөрәжәғәттәре араһында иң киҫкен мәсьәләне иғтибарға алып урындарға хакимиәттәргә тәүге яуап өсөн өс сәғәт самаһы ваҡыт бирә.
Бурыстар аныҡ билдәләнгәс, мәсьәлә лә тиҙ арала хәл ителә. Власть вәкилдәренең һөҙөмтәле эшмәкәрлеген күреп, интернет ҡулланыусылар социаль селтәрҙәге әүҙемлеген арттыра ғына.
Ҡулланылмаған закондың етешлеһеҙлектәре күренмәй тип шаярта белгестәр. Әммә сүп-сар сығарыу өлкәһендәге үҙгәрештәргә йәмғиәтебеҙ ҙә битараф ҡалманы. Шуға ла был өлкәләге мәсьәләргә лә халыҡ йышыраҡ мөрәжәғәт итә. Тимәк, рефоманы шымартыу, тармаҡ эшмәкәрлеген камиллаштырыу өсөн мөмкинлек бар. Шул иҫәптән "Инцидент" системаһы ярҙамында ла.
