Мөһим

Рөстәм Хәмитов «Башҡортостан» дәүләт концерт залында урынлашҡан 109-сы һайлау участкаһында тауыш бирҙе

Башҡортостан башлығы «Уңайлы ҡала мөхитен формалаштырыу» буйынса рейтинг тауыш биреүендә лә ҡатнашты. Непейцев дедропаркы өсөн тауыш бирҙем, сөнки бөгөн кешеләргә күркәм ял итеү урындары кәрәк, тине Рөстәм Хәмитов.

18 мар, 13:44

Янғын һүндереүселәр эш урынында тауыш бирҙе

Өфөнөң Киров районы буйынса 4-се янғын һүндереүселәр часында бер юлы ике һайлау участкаһы урынлашҡан. Унда тиҫтәләп ҡотҡарыусы гражданлыҡ бурысын үтәне. Шулай уҡ бөгөн йәшәү урынынан ваҡытлыса ситтә булған граждандар өсөн дә тауыш биреү мөмкинлектәре тыуҙырылған. Дауалау учреждениелары, шифаханаларҙан тыш, тикшереү изоляторҙарында ла һайлау участкалары эшләй.

18 мар, 19:04

Республикала ике мең ярымдан ашыу медицина хеҙмәткәре эш урынында ил президентын һайлауҙа ҡатнаша

29 дауаханала һайлау участкалары булдырылған, улар ҙа киске сәғәт һигеҙгә тиклем эшләй. Аҡ халатлыларҙан тыш, стационар дауалауҙағы пациенттар ҙа тауыш биреү мөмкинлегенә эйә. Башҡортостан һаулыҡ һаҡлау министрлығынынан хәбәр итеүҙәренсә, сәләмәтлеге буйынса участкаға барып, тауыш бирә алмаусылар өсөн дә уңайлыҡтар булдырылған.

18 мар, 19:02

Һайлау барышында сит илдән килгән күҙәтеүселәр ҙә эшләй

Һайлау участкаларында Финляндия, Швеция һәм Мексиканан килгән күҙәтеүселәр ҙә бар. Европалағы хәүефһеҙлек һәм хеҙмәттәшлек буйынса ойошма ағзалары Башҡорт дәүләт университетында урынлашҡан һайлау участкаларында ла булды. 103-сө һайлау участкаһында ике меңдән ашыу кеше теркәлгән. Йәштәр әүҙемлек күрһәтә. Өлкәндәргә һәм балаларға һайлау комиссияһы ағзалары бүләктәр - төрлө тәмлекәстәр һәм паспорт тышлығы тапшыра. Мөһим кампанияла ҡатнашыусылар концерт та ҡараны. Улар алдында сәхнә йондоҙҙары, университеттың «Йәнгүзәл» фольклор ансамбле сығыш яһаны.

18 мар, 19:00

Башҡортостандың меңдән ашыу тауыш биреү участкаһы һәм 69 территориаль комиссияһы урыны видеокүҙәтеү ҡоролмалары менән йыһазландырылған

Барыһы ла ентекле техник тикшереү үткән. Теләге булған һәр кем һайлау барышын тура эфир аша күҙәтә ала. Рәсми сайттың адресын экранда күрәһегеҙ. Шулай уҡ бында сәйәси кампанияға бәйле башҡа мәғлүмәттәр ҙә алырға мөмкин.

18 мар, 18:59

Һайлау һөҙөмтәһенә Рәсәйҙең, республиканың йылдам үҫеше, именлеге, абруйы бәйле

Был турала Башҡортостан Башлығы бөгөн гражданлыҡ бурысын үтәгән мәлдә белдерҙе. Рөстәм Хәмитов һайлау участкаһына тормош иптәше Гөлшат Ғәфүр ҡыҙы менән килде. Ошонда уҡ Дәүләт Йыйылышы - Ҡоролтай рәйесе Константин Толкачев, Хөкүмәт Премьер-министры Рөстәм Мәрҙәнов тауыш бирҙе. «Башҡортостан» концерт залында урынлашҡан 109-сы һайлау участкаһы яңы Коибтар ҡуйылған урындарҙың береһе. Бюллетендәрҙе иҫәпләү ҡоролмалары нисә кеше тауыш биргәнен шунда уҡ күрһәтеп бара.

18 мар, 18:58

Рәсәй Президенты вазифаһына 8 кандидат дәғүә итә

Үҙәк мәғлүмәт саралары хәбәр итеүенсә, әлеге сәғәткә уларҙың барыһы ла һайлау участкаларына килгән.

18 мар, 18:30

Республика Үҙәк һайлау комиссияһында һайлау барышы тураһында мәғлүмәт яңырып тора

Студия менән тура бәйләнештә йәнә Башҡортостан Үҙәк һайлау комиссияһынан Рафиҡ Әхмәтшин.

18 мар, 15:07

Һуңғы мәғлүмәттәр буйынса Ғафури районында халыҡтың яртыһына яҡыны теге йәки был кандидат өсөн тауыш биргән дә инде

Әле беҙҙең студия менән тура бәйләнешкә Красноусолдан хәбәрсебеҙ Айнур Кәбиров сыға.

18 мар, 15:04

Ә Баймаҡ районында Рәсәй Президентын һайлау 80 участкала, шуның һигеҙе ҡалала үтә

Бөгөнгө һайлауҙа 40 мендән ашыу кеше тауыш бирәсәк. Ғәҙәттәгесә, сәйәси кампанияла ауыл халҡы әүҙемлек күрһәтә. Төбәктең Сыңғыҙ ауылынан бәйләнештә Гөлнур Ишбулатова.

18 мар, 15:02

Өфөлә транзит пассажирҙар гражданлыҡ бурысын 425 -се һайлау участкаһында үтәй ала

Шулай уҡ паспортында теркәү урыны булмағандар Посад урамындағы 26-сы йортта тауыш бирә. Ил президентын һайлауҙа ҡатнашырға аҫарбаҡтар ҙа теләк белдергән.

18 мар, 14:58

Ил президентын һайлау Архангел районында ла ҡыҙыу бара

Ҡыҙыл Еҙем һайлау участкаһында барлығы 546 һайлаусы теркәлгән. Шул иҫәптән 11 үҫмер тәүге тапҡыр ҡатнаша, 98 кеше өйҙәрендә тауыш бирәсәк. Әлеге ваҡытта Ҡыҙыл Еҙем һайлау участкаһында беҙҙең ижади төркөм дә эшләй. Студия менән тура бәйләнештә хәбәрсебеҙ Айнур Кәбиров.

18 мар, 13:56

Телеүҙәк бинаһы эргәһендә урынлашҡан 185-се һайлау участкаһында ла иртәнге сәғәттәрҙән йәнлелек күҙәтелә

Сәғәт һигеҙ тулмаҫ элек үк халыҡ күп ине. Беренселәрҙән булып килеүселәр Башҡортостан юлдаш телевидениеһы бүләктәрен алды.

18 мар, 13:51

Владимир Путин Рәсәй Президенты һайлауында тауыш бирҙе

ТАСС агентлығы хәбәр итеүенсә, Рәсәй Президентына кандидат, дәүләтебеҙҙең ғәмәлдәге башлығы Владимир Путин гражданлыҡ бурысын Мәскәүҙең Косыгин урамында, Рәсәй Фәндәр академияһы бинаһында урынлашҡан 2151-се һайлау участкаһында үтәне. Дәүләт башлығы килгән мәлдә һайлаусылар өсөн һайлау участкаһына инеү сикләнмәгән. Билдәләнеүенсә, был участкала Владимир Путин тәүге тапҡыр ғына тауыш бирмәй. 2012 йылдың 4 мартында үткән Рәсәй Президенты һайлауында ла ил башлығы үҙенең гражданлыҡ бурысын тап ошонда үтәгәйне.

18 мар, 13:38

Рәсәй Президентын һайлау барышы тураһында бар мәғлүмәттәр «Башҡортостан» ҡунаҡханаһында эшләүсе йәмәғәт матбуғат үҙәгенә ағыла

Ул бөгөн иртәнге сәғәт 8-ҙә асылды һәм 19 мартта иртәнге 7-лә ябыла. Сәғәт һайын эксперттар тауыш биреү барышына комментирийҙар бирәсәк һәм килгән дәғүәләрҙе тикшерә. Йәмәғәт күҙәтеүе буйынса колл-үҙәктең ҡыҙыу бәйләнеш телефонына шылтыратыу өсөн 280-95-43 һандарын йыйырға мөмкин. Ҡаланың коды 347. Шылтыратыуҙар күп каналлы режимда тәүлек әйләнәһенә ҡабул ителә.

18 мар, 13:33

Бөгөн Рәсәй халҡы ил президенты өсөн тауыш бирә

Башҡортостанда 3 мең 436 һайлау участкаһы эшләй. Иртәнге сәғәт 10-ға алынған мәғлүмәттәргә ярашлы, республикала 300 меңдән ашыу кеше гражданлыҡ бурысын үтәгән. Был турала Башҡортостан Үҙәк һайлау комиссмияһы рәйесе Хәйҙәр Вәлиев белдерҙе.

18 мар, 13:24

Рәсәйҙә ил президентын һайлау башланды

Бөтә ил буйлап 80 миллиондан ашыу кеше үҙ тауышын лайыҡлы тип һанаған кандидатҡа бирә ала. Башҡортостанда 3 500-ҙән ашыу һайлау участоктары эшләй, уларҙың 38-е кешеләрҙең ваҡытлыса йәшәгән урынында: санаторийҙар, дауахана һәм Өфө ҡалаһының тимер юл вокзалы.

18 мар, 10:32

Быйыл Башҡортостан Үҙәк һайлау комиссияһы һәм йәмәғәт палатаһы араһында килешеү төҙөлдө

Уға ярашлы, бөгөнгө һайлауҙарҙа ун меңгә яҡын йәмәғәт күҙәтесеһе ҡатнаша. Уларҙың төп маҡсаты - һайлауҙарҙы лигитим һәм демократик шарттарҙа үтеүен күҙәтеү. Бынан тыш, Башҡортостан йәмәғәт палатаһы республика журналистар союзы һәм йәмәғәт күҙәтеү тарафынан ҙур матбуғат үҙәге ойошторҙо.

18 мар, 10:30

Бөгөн Ҡырмыҫҡалы районында генерал-майор Миңлеғәли Шайморатов исемендәге һайлау участкаһы ла эшләй

Данлыҡлы Башҡорт кавалерия дивизияһы командиры тыуып үҫкән ауылдан тура бәйләнешкә хәбәрсебеҙ Айнур Кәбиров сыға.

18 мар, 10:26

Өфөнөң 185-се һайлау участкаһына халыҡ һигеҙ тулмаҫ элек шығырым ине

Рәсәй Федерацияһы һәм Башҡортостан гимндары менән рәсми асылғандан һуң улар участкаға үтте. Беренселәрҙән булып гражданлыҡ бурысын үтеүселәр Башҡортостан Юлдаш телевидениеһы бүләктәрен дә алды. Шулай уҡ тәүге тапҡыр һайлаусылар юҡ түгел. Рудольф Нуриев исемендәге Башҡорт хореография колледжы студенттары күпләп килде. Улар киноға билет отто.

18 мар, 10:18