Закондар ҡабул ителеп, үҙ көсөнә инеп, нормалары киң мәғлүмәт саралары аша еткерелде, әммә ҡайһы бер замандаштарыбыҙҙан: "Ниңә уны ошоғаса әйтмәнегеҙ?" - тигән һорау ҙа ишетелгеләй. Был - нимә? Рәсәй кешеһенең бөтәһен дә дәүләткә һалып ҡуйыусан үҙенсәлегеме? Бәлки закондар дөрөҫ яҙылмағандыр? Шулай икән, уларҙы бит үҙгәртеү мөмкинлеге лә бар, ысулдары билдәле - күмәкләп ҡарар ҡабул итеү, артабан өҫкә ебәреү. Депутаттар менән осрашыуҙар ҙа була тора.
"Башҡортостан Республикаһы муниципаль берәмектәр Советы" ассоциацияһының башҡарма директоры Рөстәм Исхаҡов менән журналист Рәсүл Сәғитов әңгәмәләшә.
Рөстәм Исхаҡов: "Рәсәй Президенттың былтырғы мөрәжәғәтнамәһе менән сағыштырғанда, быйыл урындағы үҙидаралыҡҡа урын бирелмәне. "Урындағы үҙидаралыҡ көслө, үҙаллы булырға тейеш",- тиелде уҙған йылдағыһында. Шуның нигеҙендә 136-сы, 165-се Федераль Закондар ҡабул ителде. Төбәктәргә урындарҙа үҙидаралыҡты үҫтереүгә ҙур вәкәләт бирелде. Халыҡ менән осрашыуҙар ойошторабыҙ. Халыҡты ойоштороу - төп тәҡдим һәм халыҡ быға ҡаршы түгел. Ауылдарҙа старосталар, Ағинәйәҙәр, Аҡһаҡалдар клубтары эшләй. Власть халыҡ ҡулында. Халыҡ үҙ донъяһына бикләнеп кенә йәшәмәһен. Ауыл, район, ҡала тормошонда ла әүҙем ҡатнашһын ине. Юридик закондарҙы ла өйрәнергә кәрәк".
