"Ауыл хужалығын бөтөнләй башҡаса алып барырға кәрәк". "Аҡсаны тотона белмәгәндәргә, уны ергә һалып күмеүселәргә биреүҙән фәтеүә юҡ". Республика башлығының Саҡмағоштағы семинар-кәңәшмәлә әйткәндәренән яҡынса өҙөмтәләр былар. Ысынлап та: ауыл хужалығы беҙҙә - ҙур өҫтөнлөктә: дәүләт йыл һайын уға 8 млрд һум самаһы сығым бүлә. Был яҡтан ҡарағанда Башҡортостан - илдә иң алдынғылар иҫәбендә. Улай булғас, ниңә һуң файҙа әҙ? Ни өсөн эш хаҡы бында - иң түбәндәрҙән? Юғары булған урындар бар, әлбиттә: ҡайҙа уңыш ҙур, шунда түләү ҙә һәйбәт, ләкин был бит - күпселек түгел. Хәбәрсе Рәсүл Сәғитов Башҡортостан ауыл хужалығы министрының беренсе урынбаҫары Азат Йыһаншин менән ошо һәм башҡа мәсьәләләр тураһында һөйләшә.
