Рәсүл Сәғитов:
- Иген - Рәсәйҙең яңы нефтеме? Һәр хәлдә һуңғы йылдарҙа уның ғайәт мул йыйылғанына шаһитбыҙ, былтыр 120 миллион тоннанан ашты, был хәтлемдең 40 йыл самаһы элек, совет дәүерендә әле, унда ла сәсеүлектәрҙең хәҙерге менән йәнәш ҡуйғыһыҙ күплеге арҡаһында, урылғанын беләбеҙ. Һәм был - алға сығыу ғына ла түгел, ә башҡа тармаҡтарҙы эйәртеү ҙә, ана күпме кешенең ауылда йәшәгәнен иҫәпкә алғанда - хатта кәйеф биреү ҙә. Бында, тап ошо өлкәлә, "хужалыҡ" төшөнсәһе әлеге тармаҡ мәғәнәһе эсендә генә ҡалмай бит, ул тормош, донъя көтөү киңлегенә үк сыға, сөнки үҙ-ара бәйлелелек ҙур. Шул иҫәптән ошо арҡала ла игендең яңы нефткә әүерелеүгә ыңғайлауы тик хуплауға ғына лайыҡтыр һәм бында кешенең тәбиғәт миллион йылдар буйы әҙерләп биргәнде генә алмауы, ә алтынды үҙ хеҙмәте менән бөртөкләп йыйғаны мөһим.
Ә игенде арттырыр өсөн шарттар илдә һуңғы йылдарҙа даими яҡшыра торҙо, мәҫәлән, хаҡы арта килде, ә инде 2014 йылдан алып бөтөнләй һәйбәт һандар китте. Былтыр Рәсәйҙең бойҙай һатыуҙа донъяла беренсе урынға сыҡҡаны, йәғни Америка Ҡушма Штаттарын, Канаданы, Австралияны уҙғаны, 10 миллиард доллар самаһы килем алғаныбилдәле.
Ауыл хужалығы ветераны Зәки Ҡаҙыҡов ҡатнашлығындағы бөгөнгө "Асыҡ студия"ла ошо һәм башҡа мәсьәләләр тураһында һөйләшмәксебеҙ.
