Рәсүл Сәғитов:
- Бөгөн «Әҙәбиәт һәм ижтимағи-сәйәси тормош» тигән темаға һөйләшмәксебеҙ. Әңгәмә барышында был ике төшөнсә, үҙебеҙ ҙә һиҙмәҫтәнме, махсус рәүештәме, урындары менән алмашыныуы ла ихтимал һәм был алмашыныуҙар ниндәйҙер дәрәжәлә нимәнең нимәгә йоғонто яһауын да сағылдырыр. Әлеге үҙ-ара бәйләнеш, тәьҫирлек, Рәсәйҙең ошо осоронда, яңы тарихында, күҙгә әллә ни сағылып бармаһа ла, бәғзеләр, таҙа сәнғәт тип, араларҙың мөмкинсә алыҫлығын ҡайырһа ла, ҙурҙан алғанда, яҙыусы заманынан ситтә була алмайҙыр, булмаҫҡа тейештер, сөнки ул - ошо йәмғиәт вәкиле, барыбер ҙә шундағыны яҙырға бурыслылыр, шундағы өсөн яуаплылыр. Был белдергәндә тәү нәүбәттә тәрбиәүи көскә баҫым яһалды, һәйбәткә тыйыуҙар менән генә түгел, сәнғәти матурлыҡ менән дә ылыҡтырып булғаны асыҡ билдәле. Йәғни дәүләт үҙенең эшен алып барғанда нәфис һүҙҙе файҙалана ала ла, тейеш тә.
Әңгәмәсебеҙ - драматург, «Ағиҙел» һәм "Һәнәк" журналдарының баш мөхәррире Рәлиф Кинйәбаев.
