Бөтә Рәсәй умартасылары үҙ оҫталығын Башҡортостанда һынаны. Баш ҡалабыҙҙа ауыл хужалығындағы сағыу ваҡиғаларҙың береһе – умартасылар конкурсы үтте.
Республика, ил умартасыларының Өфөлә бер майҙанда йыйылыуы байрамға тиң. Аҡбуҙат ипподромы алдында ойошторолған бал йәрминкәһендә етештереүселәр ҙә, халыҡ та ихлас ҡатнашты.
Ҡыйынлыҡтар булһа ла республика умартасылары быйыл да мул уңыш алырына өмөтләнә. Төбәк башлығы Рөстәм Хәмитов йәрминкәлә бал ҡортолай тырышып эшләүселәр менән аралашты, тармаҡтағы проблемаларға туҡталды. Шулай уҡ "Һөнәре буйынса иң яҡшыһы" Бөтә Рәсәй профессиональ оҫталыҡ конкурсы сиктәрендә тәүге тапҡыр ойошторолған "Иң яҡшы умартасы" номинацияһында ҡатнашыусыларҙы сәләмләп, берләшергә саҡырҙы.