Рәсүл Сәғитов:
– Тарихи теманы алдыҡ бөгөн. Сөнки Башҡортостан ойошторолоуҙың 100 йыллығына яҡынлашабыҙ һәм уға бәйле саралар, төрлө проекттар күҙ алдында сағыуыраҡ баҫа бара. Юбилейҙың республика кимәлендә генә түгел, тотош ил күләмендә лә билдәләнере мәғлүм – Рәсәй президентының ошо хаҡта указы 2016 йылдың 17 июленән бирле көсөндә. Республика хөкүмәтенең саралар планы бар һәм унда шул иҫәптән нәшер итеү өлкәһендә лә тәғәйен эштәр ҡаралған.
Шуларҙың берәүһе тураһында һөйләшәйек тә. Руссанан "Тарих осорҙары" тип тәржемәләп булмалы тарихи-документаль атлас ул. Иллюстрациялы тип тә өҫтәлгән һәм быға диҡҡәтте беҙ ҙә йүнәлтәбеҙ, сөнки баҫманың үҙенсәлеге лә шунда – ғалимдарға, башҡа өйрәнеүселәргә түгел, ә тап махсус әҙерлекһеҙ уҡыусыға тәғәйен. "Осор" тип ҙур хәрефтән, берлек ялғауы менән алһаҡ – 1919-2019-сы йылдар, әлбиттә, ә уның эсендәге осорҙар – Башҡортостандың ошо бер быуатлыҡ дәүерендә үткәне-кисергәне: граждандар һуғышы, коллективлаштырыу, нефть, газ, химия, Бөйөк Ватан һуғышы, сиҙәм һәм ҡалдау ерҙәрҙе үҙләштереү һәм башҡалар.
Ҡалғанын, әйҙәгеҙ, ошоноң менән ныҡлап шөғөлләнеүсе белгес – Башҡортостан дәүләт үҙәк архивының бүлек мөдире Зөлфәр Ғәтиәтуллиндан һорашайыҡ.
