Рәсүл Сәғитов:
– 8 март алдындабыҙ һәм ошо турала һөйләшәйек тә. Заманында йыш телдәге, бөгөн, тапшырыу аҙағында, эфирға ла ҡуйылыр йырҙағыса, изге әсә лә ул, гүзәл эшсе лә ул ҡатын-ҡыҙ мәсьәләһе ҡуйыла ил алдына. Күркәм зат һәм дәүләт хакимлығы араһын да ҡарау, беҙҙеңсә, дөрөҫ булыр, сөнки демократик дәүләтбеҙ, һәр кемдең хоҡуғы тиң булырға тейешлекккә ынтылабыҙ. Йәнә лә: улар идаралыҡта күберәк ил үҫешкәнерәк, тип баһаланыла бит. Быға 20-се быуатта бөтә мәмләкәттәрҙә лә тиерлек закондарҙың үҙгәреүе, гүзәл затҡа һайланыу талаплы вазифаларға ла юл асылғаны килтерҙе. Донъя эшҡыуарлығының өстән бер өлөшө самаһы – ҡатын-ҡыҙ ҡулында йәки улар етәкселегендә икән. Ә инде гүзәл заттың һан яғынан да ишлерәк булыуы, гүйә тәбиғәттең үҙенең донъяны шулай тағы ла йәмләргә теләүе, мәҫәлән, Башҡортостанда һуңғы иғлан ҡылынған мәғлүмәттәр буйынса мең ир-атҡа мең бер йөҙ утыҙ дүрт ҡатын-ҡыҙ тура килеүе, мәсьәләнең мөһимлеген уғата арттыра.
Ҡунаҡтарыбыҙ – Рәшиҙә Солтанова, Фәүзиә Латипова, Фәриҙә Бәхтейәрова. Шундуҡ шуны ла хәбәр ҡылайыҡ: улар бер-береһен студент саҡтарынан уҡ яҡшы белә – Башҡорт дәүләт университетында бер төркөмдә уҡығандар, аҙаҡ та, хеҙмәт юлдары төрлө юҫыҡта –ижтимағи-сәйәси өлкә, журналистика, мәғариф буйынса үтһә лә, һаман шулай барһа ла, бергәләр, берҙәмдәр.
