Рәсүл Сәғитов:
– Йәйгәсә алыҫ та, яҡын да: уҡыусы балалар күҙлегенән – «тотош бер мәңгелек», ә өлкәндәр, айырыуса шул бишенсе сиректе ойоштороусылар өсөн – ана ғына тора. Йәш быуынды хәстәрләп, ләкин ололар сафынан ҡарап, мәктәп уҡыусыларының йәйге ялы мәсьәләһен уртаға һалабыҙ бөгөн. Ошоно ифрат мөһимгә сығарыуҙан был, мәғарифтың белем биреүҙән генә түгел, бәлки, унан да бигерәк, тәрбиәләүҙән ғибарәтлегенән. «Бишенсе сирек» тип тә тиккә әйтелмәне – атамаһы ялға ишаралаһа ла, йөкмәткеһе – эш. Һәм быны уҡыу йылы ахыры тип түгел, ә яңыһына әҙерлек башы тип ҡабул итәйек.
Беҙҙә ҡунаҡта – Башҡортостан мәғариф министрлығының тәрбиә һәм өҫтәмә белем биреү бүлеге баш белгесе Рәмзиә Бикҡужина.
