Кино - сәнғәттең ҡиммәтле, ҙур сығымдар талап иткән тармағы. Грант иҫәбенә генә касса тупларҙай фильмдар төшөрөү мөмкин түгел. Мәсьәләне нисек хәл итергә? Башҡорт романдары - “Ҡараһаҡал”, ”Көнгәк”, “Һауыр ҡумта”, “Карауан” һәм башҡалар, беҙҙең тарихыбыҙ, беҙҙең легендаларыбыҙ – касса йыйырлыҡ фильмдар булырға хоҡуҡлы байлыҡ түгелме ни... “Башҡортостан ”киностудияһы етәксеһе Юнир Әминев, режиссер Вилүрә Иҫәндәүләтова - ошо турала. Кино - башҡа сәнғәт һәм ижад төрҙәрен үҙенә туплаусы. Әҙәбиәттән - сюжет, сценарий, театрҙан - декорация, актерҙарҙы ролдәргә һайлау оҫталығын, һынлы сәнғәттән композиция, төҫтәр доньяһын алған. Беҙҙә әҙәбиәт тә, театр ҙа, һынлы сәнғәт тә юғары камиллыҡта. Тимәк, уларҙы бергә туплаусы Синема ғәли йәнәптәре лә ошо үргә етеү тейеш.
