Аутсорсинг башлыса һаулыҡ һаҡлау, мәғариф һәм мәҙәниәт тармаҡтарына ҡағылды. Бер нисә йыл ошо системаны индереү эше алып барыла. Инглиз теленән беҙҙеңсәгә тәржемәләгәндә “сит сығанаҡтарҙы файҙаланыу” тип аңлатырға мөмкин. Йәғни, предприятие - ойошма, тармаҡтың айырым эштәрен килешеү нигеҙендә башҡа, ошо йәһәттән махсуслашҡан ойошмаға йөкмәтеү. Йәмғиәттә һәр яңылыҡ ҡатлаулы ҡабул ителә. Ә уның файҙалы яҡтарҙан тыш, кире осраҡтары ла асыҡланһа, уныһы етди тәнҡиткә эләгә. Быныһы - берҙән. Икенсенән, һәр яңылыҡты ҡул сабып ҡаршы алмаған кеүек, йәмғиәттең генә түгел, иҡтисадтың да уға әҙер булыуы шарт. Аутсорсинг- тәү маҡсат түгел. Уны теләһә ниндәй юлдар, фарман биреп уҙғарыу ярамай. Йәмғиәт, социум, иҡтисадтың әҙерлеге, өлгөрөүенә бәйле ҡабул ителә бара һәр яңылыҡ.
