Бөгөн алтынсы саҡырылыш Башҡортостан Дәүләт Йыйылышы – Ҡоролтайҙың беренсе ултырышы үтте. Республика парламенты күп партиялы. Депутаттар араһында йәштәр ҙә байтаҡ. Политологтар Дәүләт Йыйылышында үҙенсәлекле синтез барлыҡҡа килде, тип билдәләй.
Бөгөн халыҡ һайланыусыларын студиябыҙҙа сәләмләйбеҙ. Улар: Юнир Ғәлимйән улы Ҡотлоғужин, Руфина Алик ҡыҙы Шаһапова һәм Гөлнур Ғәлинур ҡыҙы Ҡолһарина.
Башҡортостан парламентында 110 депутат эшләй. Уларҙың яртыһынан күбеһе - яңы кешеләр. “Араларында ҡатын-ҡыҙҙарҙың күп булыуы ҡыуаныслы күренеш”, - ти "Берҙәм Рәсәй" фирҡәһенән Гөлнур Ҡолһарина.
“Халыҡ өсөн файҙалы закондар ҡабул итергә кәрәк”, - ти Рәсәй Федерацияһы Коммунистар партияһынан Юнир Ҡотлоғужин.
“Парламент ул фекер алышыу, дискуссиялар майҙансығы булырға тейеш”, - ти "Йәшелдәр" Рәсәй экология партияһы вәкиле Руфина Шаһапова.
