Рәсүл Сәғитов:
Фән йәмғиәткә ниңә кәрәк? Мәҫәлән, ҡатмарлы, ҡайһы саҡ хатта серле күренештәрҙе аңлатыр өсөн. Фән – күҙәтеүсән, ҡыҙыҡһыныусан шәхестәр, асыштар яһау, яңы ғилемдәр өҫтәү, уларҙы кешелеккә яҡынайтыу һәләте тәбиғәттән үк һалынған йоморо баштар урыны. Йәғни фәндең мәртәбәһе – йәмғиәткә файҙала, тормошто матурайтыуҙа. Белемдең ҡасандыр һүрәтләүсе генә булған бөтә тармаҡтары ла – медицина, биология, тарих, социология, тел ғилеме һәм башҡалар бөгөн – үҫештең күпкә юғары баҫҡысында.
Шуның менән бергә фәндең әһәмиәте шиккә лә ҡуйылыусан: йәнәһе, ул яҡшылыҡтан бигерәк яманлыҡ килтерә. Шулай тиелгәндә ҡорал иҫкә төшөрөлә, машиналарҙың кешене һаман ҡыҫырыҡлағанына, ә бының инде эшһеҙлекте үрсеткәненә, тимәк, әҙәм балаһының бәҫе төшә барыуға ишаралана. Һәм бында беҙ мәсьәләнең әхләҡи яғына сығабыҙ – ниндәй генә бөйөк асыш балҡымаһын, ул кеше ихтыяжына хеҙмәт итһен. Инеш һүҙҙең ҡыҫҡа һығымтаһы – бына шул.
Ә өлкәләге бөгөнгө хәл, ниәттәр тураһында Башҡортостан Фәндәр Академияһы президенты Әлфис Ғаязов менән һөйләшәбеҙ.
