"Башҡортостанда эшҡыуарлыҡ үҫешенә яңы һулыш", - тине аналитиктар шәмбе сараларынан һуң. 25 майҙа Республика башлығы вазифаһын ваҡытлыса башҡарыусы Радий Хәбиров бизнес вәкилдәре менән осрашты, асыҡ диалог ҡоролдо. Осрашыу Өфөнөң Мир урамындағы "Китап" бизнес-үҙәгендә ойошторолдо, әйткәндәй унда, Күп функциялы үҙәк базаһында республикала иң беренсе булып эшҡыуарҙар өсөн үҙәк асылды. Ошонда уҡ коворкинг-үҙәк тә эш башланы. Башҡортостанда эшҡыуарлыҡҡа дәүләт ярҙамы, бизнесты быуыуҙы туҡтатып, уны алтын йомортҡа һалыусы тауыҡҡа әйләндереү – ошолар тураһында һөйләшәбеҙ бөгөн. Республиканың Эшҡыуарлыҡ һәм туризм буйынса дәүләт комитеты белгесе Зилә Ғәббәсова, “Рейтинг” мәғлүмәт-консультация үҙәге етәксеһе Рәис Тайбугин, эшҡыуар, “Башбланкиздат” йәмғиәте директоры Гөлсәсәк Әлибаеваны "Асыҡ студия"ла сәләмләйбеҙ.
