Рәсәй Берҙәм тауыш биреү көнөнә әҙерләнә. Быйыл ул сентябрҙең 8-енә тура килә. Хәйер, был турала радио тыңлаған, телевизор ҡараған, интернетта гиҙгән һәр кем беләлер. Реклама, өгөттәр гөрләп бара. Урамдан үткәндә лә йылмайған йөҙҙәр, саҡырыуҙар тулы плакаттар осрап тора. Бөгөнгө эфирҙа беҙ Һайлауҙың республикабыҙға, халҡыбыҙға ҡағылышлы өлөшөнә туҡталырбыҙ- Башҡортостан Республикаһы Башлығын һайлау, ауыл советтары депутаттарын күрһәтеү. "Асыҡ студия" эксперттары - философия фәндәре докторы, Башҡортостан башлығы ҡарамағындағы дәүләт хеҙмәте һәм идаралыҡ академияһы профессоры Фәниә Вәли ҡыҙы Дәминдәрова, журналист, сәйәси күҙәтеүсе, "Башҡортостан" газетаһы хәбәрсеһе Рәшит Шәрифулла улы Кәлимуллин.