Башҡортостан сираттағы форум уҙғара. Хәйер, беҙҙе Конгрестар башҡалаһы тип йөрөткәс, бындай сараларға күнегеп тә бөткәнбеҙ. 2015 йылда ШОС-БРИКС саммиты барышында, беҙҙә йыл һайын ошо ойошмаларға ингән дәүләттәрҙән урта һәм кесе бизнес вәкилдәренең осрашыуын уҙғарып торорға килешелгәйне. Шунан бирле өҙөлмәй, йыл һайын үтеп килә ул Өфөлә. Кесе эшҡыуарлыҡ вәкилдәре саммиты алдынан Республикала бизнес торошо, халыҡ-ара бәйләнештәр, инвесторҙар менән эш, иҡтисадты күтәреү юлдары тураһында һөйләшәбеҙ. “Асыҡ студия” эксперттары - Иҡтисади үҫеш министрлығы ҡарамағындағы Үҫеш корпорпацияһы Акционерҙар йәмғиәтенең Айырым иҡтисади зоналар проекты етәксеһе Айбулат Хәйбуллин менән “Рәсәй опораһы” ойошмаһының башҡарма директоры Тимур Лоҡманов.
