Апрель айының тәүге тулы аҙнаһы ла аҙағына яҡынлаша. Яҙғы ташҡын мәлендә ярҙарына һыймай тулышып аҡҡан йылғалар һымаҡ, ваҡиғалар ҙа мул ғына булды көндәрҙә. Мөһимерәктәренә, һәр беребеҙгә ҡағылышы булырлыҡтарына йәнә бер туҡталырбыҙ. Шулай итеп беҙҙең Даирәлә: - Берҙәм булғанда ғына еңеп була уны. Террорға ҡаршы көрәш темаһы йәнә көнүҙәк. - Иҡтисад арбаһын кем тарта ла, ҡайҙа бара? Был аҙнала Башҡортостандың иҡтисади мөмкинлектәре барланды. - Магазиндан ғына, акциз маркаһы йәбештерелгәнен генә алып буласаҡ. Көмөшкә ҡыуыусылар, суррогат алкоголь һатыусылар өсөн закон ҡәтғиәләшә. - Бер тырмаға баҫа баҫа, аҡһамаймы аяғы, күгәрмәйме маңлайы? Халыҡ даими иҫкәртелһә лә, мутлашыусылар мутлы уңышын йыя бирә. Алдағы минуттарҙа ошо һәм башҡа ваҡиғаларға ентекле туҡталырбыҙ...
