XXI быуатта планетаның халҡы — дүрт, ә һыу ҡулланыу алты тапҡырға артҡан. Ғалимдар яҙыуынса, эсәр һыу етешмәү киләсәктә күпселек илдәрҙең иҡтисадын тотҡарлаясаҡ һәм халыҡ-ара хәлде көсөргәнешле итеүсе төп факторға әйләнәсәк. Ер шарының күп төбәктәрендә, башлыса халыҡ тығыҙ йәшәгән урындарҙа, һыуға ҡытлыҡ кисерәләр. Байтаҡ дәүләттәрҙә күптән инде һыуҙы нормалап биреүгә күстеләр. Беҙҙә иһә тәбиғәт байлығына мөнәсәбәт нисек икән? Эсер һыуҙы ҡәҙерләйбеҙме һәм тыуған яҡ биҙәге – шишмәләрҙе һаҡлайбыҙмы? Башҡортостан шишмәләре ниндәй хәлдә? “Беҙҙең яҡ шишмәләре” тип аталған әңгәмәлә ҡатнашыусылар үҙҙәренең төбәгендәге шишмәләр, уларҙың бөгөнгө торошо тураһында бәйән итә.
