1941 йыл. Һуғыш башланған йылдың ҡышы. Башҡорт дәүләт филармонияһында музыкаль-әҙәби лекторий эш башлай. Уны Мәскәүҙән Өфөгә эвакуцияланған билдәле музыка белгесе һәм лектор Григорий Поляновский ойоштора. Концерт-лекцияларҙың төп маҡсаты – халыҡтың патриотик рухын күтәреү була. 70 йылдан ашыу тарихы булған музыкаль-әҙәби лекторий әле лә уңышлы эшләй. Филармонияның иң тәүге коллективтарының береһе юбилейын билдәләй. Оло байрамды ул ниндәй уңыштар менән ҡаршы ала? Бөгөн музыкаль-әҙәби лекторий тамашасыларға ниҙәр тәҡдим итә? Быйылғы ижад миҙгеле филармония тарихына ниндәй яңы биттәр өҫтәгән? Ошо һәм башҡа һорауҙарға Хөсәйен Әхмәтов исемендәге башҡорт дәүләт филармонияһы хеҙмәткәрҙәре, нәфис һүҙ оҫтаһы Эльмира Юлдашева һәм реклама бүлеге етәксеһе Ирина Захарова яуап бирә.
