Өйҙәрен шыршы менән биҙәүселәр ике төргә бүленә. Берәүҙәр тере ағасҡа өҫтөнлөк бирә. Ысын ағас – ул ылыҫ еҫе, бала саҡтан килгән байрам кәйефе, ти улар. Икенселәр иһә тәбиғәткә зыян килтермәйем тип яһалма шыршы ҡуя. Энәләре ҡойолмай, һынмай. Йәшел төҫтәгенән башҡа көмөш, алтын төҫөндәге ялтырауыҡлылары ла бар. Пластмассанан яһалған шыршыны бер нисә йыл буйы файҙаланыу мөмкинлеген дә иҫәпкә алһаң, яһалма ҡупшыҡайҙың өҫтөнлөгө бәхәсһеҙ – ти улар.
