Мәжит Ғафури исемендәге башҡорт дәүләт академия драма театры 2019 йылда үҙенең 100 йыллыҡ юбилейын ҡаршыларға әҙерләнә. Театрҙың асылыу тарихы 1919 йылға барып тоташа. Бөгөнгө көндә республиканың төп театры статусына эйә булған, халыҡ мәҙәниәтен, милли рухты һаҡлаған, юғары әхлаҡи ҡиммәттәрҙе быуындан-быуынға тапшырыусы был мәҙәниәт усағы үҙенең 99-сы ижад миҙгелен асты. Нисек йәшәй бөгөн театр, халыҡ күңелен яуларлыҡ ниндәй премьералар әҙерләй? Олпат сәнғәт усағында йәштәр үҙен нисек тоя? Ошоларҙың барыһы хаҡында йырлы самауырыбыҙ янында һөйләшергә ниәтләнек. Студиябыҙ ҡунаҡтары – театрҙың талантлы актерҙары Римма Ҡаһарманова һәм Азат Вәлитов.
