Йомабикә Сәләхетдин ҡыҙы Ильясова Хәйбулла районы Аҡъюл ауылында тыуа. Бала күңелле ата-әсәһе, йәнтөйәгенең күркәм тәбиғәте һәм кесе йәштән башҡорт китаптарын йотлоғоп уҡыу уның нәфис һүҙгә һәләтен ҡеүәтләй, ижадҡа дәртләндерә. “Яуа, яуа алтын япраҡтар” тип исемләнгән тәүге йыйынтығы 1990 йылда баҫыла. “Һарғайма, йәй”, “Ҡабырсаҡта”, “Бәхет янында” тупланмаларында ла тәрән хисле, нескә лирикаға, үҙенсәлекле фекергә бай шағирә асылы сағылыш таба. Йомабикә Ильясованың шиғырҙарын Башҡортостандың халыҡ артисы Рәмилә Сәлимгәрәева уҡый.
