Ғалим Миңлеғәле Нәҙерғолов тигәндә ҡорҙаштары "ир тигәнең ике утыҙын тултырҙы" тейер, һөнәрҙәштәр "филология фәндәре докторы, Тарих, тел һәм әҙәбиәт институтының әҙәбиәт секторы мөдире" тейер, уның эшмәкәрлеген баһалаусылар "халҡыбыҙҙың арҙаҡлы улы" тейер, студенттары "остазыбыҙ" тейер, һабаҡташтары, йәшлек дуҫтары "ышаныслы кеше" тейер, йәмәғәте Фәнүзә ханым "өс балабыҙҙың – Ләйсән, Лилиә, Булаттың хөрмәтле атаһы" тейер. Ғалим тураһында артабан да төрлө юҫыҡта шулай һанап китергә мөмкин. Халҡыбыҙҙың уҙған быуаттарҙағы рухи байлыҡтарының телен белеп йәштәргә өйрәтеүсе, киң йәмәғәтселеккә еткереүсенең эшмәкәрлеге тураһында беҙ ҙә бер аҙ мәғлүмәт еткереү, һөнәрҙәштәренең ихтирам һүҙҙәрен ишеттереү ниәтендәбеҙ.
